LINGUA - CULTURA - MUSICA : 1817, Salvatore Viale è A Dionomachia


Rédigé le Venari u 25 di Maghju 2018 à 09:14 | Lu 24 commentaire(s)


Salvatore Viale hè natu in u 1787 in Bastia, in u quartiere di Terra Vechja, in una stretta di U Mercà. Era magistratu, ma era soprattuttu un omu di Lèttere, facìa parte di l’intelletuali bastiacci, avìa creatu, cù qualchi amicu, un chjerchju literariu : l'Accademia di i Vagabondi (chì ci veneranu parechji scrittori è pueti taliani è ancu inglese).


In giuventù, Salvatore Viale hè partuttu à studià u dirittu in Roma è po hè vultatu per esse pricuradore in Bastia. Ma a so vera passione era a puesia…

L’òpera più maiò di Salvatore Viale hè un puema, chì si chjama « A Dionomachia ». Ghjè una storia di guerra trà paesi intornu à Bastia, trà i paesi di U Borgu è di Lucciana.

Eccu a storia : simu d’aprile, per a festa di Pasqua, è l’omi di U Borgu pàrtenu in prucessiò versu Lucciana. Propiu à mezu à u caminu, vèdenu una carogna di sumere, meza fràcica… Pènsanu tutti chì chjè una pruvucazione, di i paisani di Lucciana. S’annèrvanu, sò furiosi, vòlenu tumbà tuttu u mondu. Dopu à avè lampatu issa carogna nantu à a strada di a prucessiò di quelli di Lucciana, tòrnanu in paese, sempre annervati !

Quandi i paisani di Lucciana ghjùnghjenu à so tornu nantu à a strada, vèdenu a carogna di a sumera in pienu mezu. Sùbitu sùbitu, pènsanu cum'è l'altri chì ghjè una pruvucazione di quelli di U Borgu. Allora, di notte tempu, vanu à lampà a sumera fràcica davanti à a chjesa di U Borgu…

I dui paesi èntrenu in guerra, è fù una battaglia di parechji ghjorni cù parechji morti è parechji feriti.

À traversu à issa fola, Salvatore Viale tratta di un veru prublema di a Còrsica di st'èpica : a viulenza trà i Corsi. A « Dionomachia » hè dinù una crìtica di guerre di Napuleone, chi insanguinèghjanu l'Europa. A prima edizione di stu puema eroicòmicu hè stata in u 1817, è ùn era micca signata da u so autore, chì u libru era statu censuratu.

Ci hè dinù, in issu libru, parechje riferenze à a vita d’ogni ghjornu in Còrsica, (Salvatore Viale parla di i lamenti, i vòceri è altre tradizione…).

Interessu maiò, infine, hè chì, in stu libru, scrittu in lingua taliana, apparisce u famusìssimu « Serinatu di Scappinu », scrittu propiu in lingua corsa : hè a prima volta ch'ella vene scritta, in un modu mudernu, a nostra lingua.

Salvatore Viale fù un militante è un difensore di a lingua corsa è di a cultura taliana contru à a lingua francese.

 

« La langue d’un peuple est l’expression complexe de sa façon de penser et de sentir, de ses usages civils et domestiques ; c’est le dépôt, en quelque sorte, de ses traditions, de son histoire, de sa littérature, toutes choses en lesquelles, pour une grande part, consiste la patrie »

Salvatore Viale, Dell’uso della lingua patria in Corsica1

1 S. Viale., 1858, « Dell’uso della lingua patria in Corsica », Archivio Storico Italiano, n.s., t.VI, parte 2, pp.25-37, in P. Marchetti., 1989, La corsophonie un idiome à la mer, Albatros, p.74.




Ind\'a listessa rubricca
< >

Venari u 25 di Maghju 2018 - 09:24 LINGUA - CULTURA - MUSICA : 1914, A Cispra

Venari u 25 di Maghju 2018 - 09:19 LINGUA - CULTURA - MUSICA : 1977, I Chjami Aghjalesi


Praticalingua, hè assai di più chè una furmazione

Praticalingua, hè assai di più chè una furmazione


Seguìtaci nant'à Twitter

è nant'à Facebook

Induve simu

U nostru lucale si trova indè u Cunventu Sant'Ànghjuli, daretu à u Palazzu di Ghjustizia.