PRATICALINGUA

STORIA DI CORSICA : 1975, l'affare d'Aleria


À quell'èpica, in l'anni 70, u muvimentu naziunale hè raprisentatu dà l’autunumisti di l’Azzione Regiunalista Corsa di i fratelli Siméoni.
U « manifestu di Penticoste » di Ghjustizia Paulina, distribuitu u 20 maghju di u 1975, dumanda una lotta più forte chè quella di l’ARC.


 

À u cungressu di Caterraghju, u 19 di lugliu di u 1975, certi giòvani più accaniti si fàcenu sente. In Corti, u 17 d'agostu, ci sò più di 6000 persone chì assìstenu à a reunione chì chjode e ghjurnate di l’ARC, si riparla d’autunumia ind'è a Repùblica francese è si dice di nò à a viulenza. Ma pè a prima volta si sente, ind'è u publicu, striti è motti cum'è « libertà » è « i francesi fora ».

 

Certi chjàmanu à a rivolta, Edimondu Simeoni cambia discorsu è parla di lotta rivuluziunaria di liberazione è di offre à a patria, a libertà è u sangue di i militanti.

U ghjovi 21 d'agostu, à bon’ora, 8 persone cun fucili di caccia, Edimondu Simeoni à u cummandu, assàltanu a cantina Depeille, à l’entre d’Aleria, u scopu hè di parlà di u scàndalu di a vinaccia, stu vinu fattu incù zùccheru è qualchì volte senza uva. Parechji pedineri sò incriminati indè un affaracciu finanziaru è st’occupazione hè stata fatta pè cunstringhje u Statu francese à fà rispettà a lege è falla finita cun st’ affare, da fà cunosce à u populu corsu è u mondu a situazione culunialista di nostr’isula.

 

Edimondu Simeoni hà u sò prugramma : u vènneri 22, una reunione di travagliu cù e forze di prugressu, u sàbatu 23, di matinata, una cunferanza di stampa pè infurmà l’opinione pùblica di tamantu scàndalu vinaghjolu, a dumènica 24, à 4 ore di sera, una grande reunione pùblica nant'à u tema « avà basta », « scrucconi fora », « terra corsa à i corsi ». Eppo dopu, ognunu si ne torna in casa soia.

 

Ma u Statu francese vole impone a lege è hà un pocu paura, in oltre, chì bande armate s’affàcchinu versu Aleria.

U vènneri matina, tuttu u circondu hè pienu di gendarmi è di CRS, cù 6 elicòtteri è 4 vitture imbardate, in tuttu più di 2500 omi.

Ma ind'è a cantina, parechji giòvani anu righjuntu i primi 8 è sò avà quasi 30 determinati. Pè i Corsi, tutti sti suldati pè impedisce à Simeoni di parlà di ghjustizia, hè sprupusitatu.

U ghjovi, a Còrsica era sfavurèvule o indifferente à st’occupazione ma u lindumane quasi tutta a Còrsica era daretu à Simeoni.

U vènneri, à 4 ore è un quartu dopu meziornu, cummencia l’assaltu, ma daretu à u dispusitivu militariu francese ci sò centinaie di militanti autonomisti.

2 gendarmi sò morti, parechji ferriti, un militante hè ferritu à u pede, ciò chì Simeoni ùn vulìa hè accadutu, allora si rende è i sò cumpagni fùghjenu in camiò, l'arme in manu.

In Aleria, a storia muderna di a Còrsica hè scambiata, a giuventù corsa hè in còllera è si svèglianu e cuscenze pulìtiche.

È sì Aleria paria un affare di nunda - solu dumandà ghjustizia è dinunzià malfatte - a reazzione di u Statu francese hà fattu cresce a vuluntà di certi Corsi d'andà più luntanu, è cusi nascerà, u 5 di maghju di u 1976, u Fronte di Liberazione Naziunale di a Corsica.