PRATICALINGUA

STORIA DI CORSICA : 1980, l'affare Bastelica-Fesch


A dumènica di u 6 di ghjennaghju di u 1980, trè omi armati sò arrestati in Bastèlica da militanti naziunalisti chì anu avutu l’infurmazione chì a ghjente di FRANCIA vulìa tumbà à Marcel Lorenzoni, un militante autonomistu di Bastèlica.


FRANCIA hè un'organizazione clandestina chì principia e so azzione in u 1977 contru à i naziunalisti, plastichendu e so case, i so cummerci o e so vitture, certe volte senza fà casu à a so vita, o, forse ancu, cerchendu a tumballi. Si sà chi st’organizazione face parte di u SAC (Serviziu d'Azzione Civica) u serviziu d’òrdine di u RPR.

I trè omi sò ritenuti in una stanza di a casa cumuna di Bastèlica è interrugati. Unu trà di elli ricunnosce quasi sùbitu esse di FRANCIA, è ch'elli sò cullati à tumbà a Lorenzoni. D’altronde, i naziunalisti tròvanu dui documenti di u SAC è di u RPR à u so nome : Alain Olliel.

I naziunalisti di Bastèlica fàcenu cunnosce sti fatti à i gendarmi, à u Prefettu è à i giurnalisti. Vòlenu organizà una cunferenza di stampa u marti dopu meziornu da palisà à tutti chì l’omi chì fàcenu attentati contr’à i naziunalisti dipoi parechj'anni sò mandati da i retali Gullisti di u Putere. Dìcenu dinù chì dopu à sta cunferenza di stampa lasceranu i so prigiuneri à i gendarmi.

Ma u Prefettu ùn hè micca d’accunsentu. Manda i gendarmi à accampà u paese u luni à sera. A cunferenza di stampa un si pò micca fà. Dopu meziornu, i gendarmi èntranu in paese è arrèstanu parechje persone. Ma i militanti ch’avìanu chjappu à quelli di FRANCIA sò riesciuti à scappà cù i so prigiuneri.

Ind’a notte, in Aiacciu, i trenta naziunalisti di Bastèlica, rinfurzati da militanti di tant'altri lochi di Còrsica si stàllanu à l’ottellu Fesch induve ritènenu una decina di persone. Pocu tempu dopu, i gendarmi ghjùnghjenu à accampà u casale. Daretu à elli vene assai mondu à manifestà in sustegnu à i paisani.

Longu à a ghjurnata, cresce a tensione da una parte è da l’altra.

Un culletivu di 44 organizazione, induve s’adunìscenu l’UPC (Unione di u Populu Corsu), u Partitu Cummunistu, a CGT (Cunfederazione Generale di i Travagliadori), è sin’à pìccule organizazione cum’è Bugnu Corsu, manda i so ripresentanti à pruva di fà a leia trà i paisani di Bastèlica è u Prefettu per esce senza viulenza di sta gattiva situazione.

Ma in carrughju l’affare vanu di male in peghju trà i gendarmi è i manifestenti. Da un latu si làmpanu petre, buttiglie è coktails molotov è da l’altra si risponde cù granate lacrimògeni tirate à brusgia pella.

Versu ondeci ore di sera u sangue casca ! Trè CRS sò tirati di pistola da un omu piattatu trà i manifestanti. Un mortu, dui feriti ! À mezanotte, un pulizzeru, ch’ùn capisce più ciò chì si passa, tira nantu à una vittura chì prova di cacciassi da a manifestazione. Duie donne sò culpite à u core è à u capu ! Una si ne more…

À I Salini, à un sbarramentu stradale, un giòvanu chì ùn hà nunda à chì vede cù l’evenementi è chì s’era piantatu comu si duvìa à u cuntrollu hè tombu da i pulizzeri, ùn si sà perchè, quand’ellu face per ripiglià a strada. Ci hè, tandu, un para piglia è teni trà gendarmi à pulizzeri, ognunu dicendu chi ghjè l’altru chì hà tiratu !

U lindumane, l’affare sò assai tesi. A ghjente ùn pò micca accettà ciò chì s’hè passatu. Ùn si capisce micca perchè u Prefettu ùn discuta micca cù i militanti di Bastèlica. Cù a sera chì s’avvicina, si sente chì millaie di gendarmi anu da sbarcà, chì u FLNC hà da intervene… senza pudè dì cun certezza s’ella hè vera o nò.

Versu 7 ore di sera, i gendarmi, ghjunti in forza, pìglianu pusessu di u carrughju aiaccinu caccendu i manifestanti.

Ghjunghje ancu u GIGN, chì si mette in piazza in giru à l’ottellu è s’appronta à assaltà.

Dopu à una discussione trà i fratelli Lorenzoni è i capi di u GIGN, i Bastelichesi accèttanu di rèndesi. Vanu da per elli, cù e so bandere è e so armi, à fassi prigiuneri à u cummissariatu. Sò tasferiti in Parigi per esse ghjudicati da a Corte di Sigurezza di u Statu.

Olliel hè trovu da i gendarmi in l’ottellu, Bertolini, u capimachja di u commando, hè cappiatu da i naziunalisti ind’a notte di u sàbatu, in Ulmetu. Sò tutt'è dui  inculpati per trasportu è pusessu d’armi. U terzu, un certu Leonelli, era statu cappiatu nanzu da Lorenzoni. Dicìa esse infiltratu in FRANCIA pè u contu di u FLNC.

Bastelichesi saranu cundannati per sechestrazione da unu à cinqu'anni di prigiò. Bertolini è Olliel ùn saranu micca cundannati. I pulizerri chì anu tiratu in carrughju, ùn saranu mai trovi nè ricircati.