praticalingua

Associu praticalingua - Carrughju Sant'Ànghjuli - praticalingua@gmail.com - 07 88 16 51 35

STORIA DI CORSICA-PERSUNAGI: 1000, Arrigu Belmesser




Ugo Colonna: Sestu Contu di Corsica


Tuttu ciò chì hè cuntatu quì hè statu inspiratu da e cròniche di u medievu chì anu parlatu di sta storia, ma parechji sèculi dopu i fatti, è si sà chì sti scrittori anu pussutu, à l'occasione, imbellì l'orìgine di i grandi signori chì i pagàvanu, per certi, per scrive a so propia storia.
 
U sestu Conte di Còrsica, natu versu l'annu 940, era un discendente di u famosu Ugo Colonna, chjamatu Arrigu Colonna, è chi face parte di a legenda di a nostra storia.
Era un bel omu, curtese, generosu è ghjustu, è ghjè per ciò chì hè forse più cunnisciutu sottu à u so cugnome di Arrigo Bel Messere. Cum'è i so antenati, tene u so tìtulu di Conte da u Papa.
Hè u primu pacificadore di a Còrsica, hà predicatu l'unione ind'è l'ìsula sana. U primu omu putente à esse esciutu da a bughjura di a nostra storia.
 
Hè maritatu cun Ginebra, un'aristocrata di Roma, è hà avutu ottu figlioli (sette maschi è una fèmina). A so figliola si marita cun Antonio, figliolu di u Conte Forte di Cinarca.
À l'èpica, i signori si spartìanu e terre è facìanu ciò chi li parìa senza occupassi tantu di u pòveru pòpulu.
 
I Colonna èranu rispettati dapoi chì Bianco Colonna avissi mandatu fora i Sarracini, è Arrigu ghjunghje à u Pudere in l'annu 968.
Arrigu avìa assiguratu a tranquillità di l'ìsula, avìa fattu esentà i so sugetti da un impòsitu ch'elli devìanu à Roma,  avìa numinatu ghjùdici è offiziali, ma cum'ellu era un omu di spìritu ghjustu è santu, era sempre cavalchendu per purtà a bona parolla in ogni locu.
 
U pòpulu era pienu d'affezzione è d'amore per Arrigu, cum'è s'ellu fussi u babbu di tutti.
U pòpulu sperava assai, in st'omu di pace è di ghjustizia, operendu per a prusperità di tutti, è chì facìa una Còrsica infine appaciata. Ma tuttu què, ùn piacìa tantu à l'altri signori.
Un ghjornu, Arrigu hè chjamatu à ghjudicà un affare : u conte Forte pritendìa chì u castellu di Tralavetu, chì si trova à a foce di Seghja, accantu à Cavru, era nant'à u so territoriu, è dunque sottumessu à a so ghjuridizzione, ma i tralavetacci ùn eranu d'accunsentu.
 
Arrigu, chì si ne riturnava in u so castellu di U Poghju di Vènacu, era cù i so sette figliulucci è una trentina d'omi, s'arresta à a foce d'Aregnu, sopra à u ponte di Tralavetu, per rèndesi contu è fà a ghjustizia.
 
Tralavetacci, pensàvanu chì u ghjudicamentu fussi persu pur'avanti di cumincià, vistu u ligame famigliale trà Arrigu è Forte. Ma à mumentu datu, Arrigu hè solu è una lancia lampata u trapassa.
Forte tomba l'assassinu, pò hè barrufa generale, i partigiani di Travaletu spùntanu da tutte e parte è si làmpanu nantu à Cinarchesi. Forte riesce à scappà.
 
Ma i sette zitellucci sò chjappi è i signori di Tralavetu, pieni di rabbia, i ghjèttanu sottu à u ponte è l'annèganu  cum'è pullastri.
 
Ci vulì à falla finita cun Arrigu è a so discendenza.
U celu fù cusì inzergatu di sta morte chì una voce celeste ribumbò per i monti è i paesi all'intornu : « hè mortu Arrigu Bel Messere è a Corsica anderà di male in peghju ».
Dopu à st'orrìbile affare, e ghjente di u rughjone anu chjamatu stu ponte « u ponte dei setti polli »
Tuttu què si passò di maghju in l'annu 1000, l'annata chì era, per assai ghjente, l'annata di a fine di u mondu.
 
Ghjè stu ghjornu ch'ella hè nata un'angoscia cullettiva è s'hè imposta l'idea di disgrazia per l'eternità. E frase di l'autori sò sferente, cum'è « Mortu u  contu Arrigo Bel Messere, guai à noi » o « hè mortu u contu Arrigo Bel Messere, a Corsica un averà mai bene ». Sè e frase sò sferente, u spìritu hè u listessu, si parla di fatalità, d'òrdine messu à male, u peghju hè da vene è a pòvera Cursichella anderà di male in peghju.
 
 
In reazzione à st'affaracciu, Ginebra, cun i cumpagni è amicchi, assalta u castellu di Tralavetu è sterpa à tutti, finu à l'ùltimu.
I signori, prima uniti da vindicà a morte d'Arrigo, si bàttenu avà per piglià a suprana è u tìtulu di conte, allora chì anziani offiziali fòndanu signurìe indipendente.
 
Un ci hè più maestru per a Còrsica, ci sò vindette, spedizione punitive, hè una vera guerra civile, l'ìsula casca ind'è l'anarchìa feudale, orìgine, segondu a famosa legenda, di tutti i guai.
 
 



Ind'a listessa rubricca
< >

Venari u 25 di Maghju 2018 - 09:24 LINGUA - CULTURA - MUSICA : 1914, A Cispra

Venari u 25 di Maghju 2018 - 09:19 LINGUA - CULTURA - MUSICA : 1977, I Chjami Aghjalesi




QUALE SIMU ?

Praticalingua hè di più chè un locu induve si ampara u corsu. Pudete seguità una furmazione di lingua corsa o in lingua corsa (segondu l’attelli) ma, al di là, ci truvate a ghjente, ci tuccate un bichjeru o ci biite un caffè in un spaziu assestatu apposta. Pudete vene dinù à prufittà di un spaziu bibbiuteca. Hè un locu 100% cursòfunu induve vo pudete stà à sente, dumandà rinsignamenti o cunsigli è soprattuttu mèttevi à parlà corsu à u vostru rìtimu. 




QUALE PÒ VENE ?

Ind’è noi, ci vènenu :

Ghjente d’ogni età : ciucci, adulescenti è adulti.

Ghjente chì scòprenu a lingua.

Ghjente chì anu bisognu di ripiglià cunfidenza per parlà corsu è chì ghjùnghjenu per francà u passu è parlà più vulenteri.

Ghjente chì u corsu u pàrlanu benìssimu è chì ghjùnghjenu à amparà affari artìstichi, culturali o patrimuniali è à sparte u so sapè.

Ind’è noi, ci vènenu ghjente chì vòlenu praticà a so lingua è sparte una stonda d’amicizia, o passà da u parlà à u fà !




Induve simu ?

U nostru lucale si trova indè u Cunventu Sant'Ànghjuli, daretu à u Palazzu di Ghjustizia.



Seguìtaci nant'à Twitter

è nant'à Facebook