PRATICALINGUA

PRUGETTU CREAZ(Z)IONE





A SFIDA


" U corsu ùn pò parlà di tuttu "

Ci serà modu di mudernizà a nostra lingua è permètelli di ghjunghje in campi d'attività induv'ella ùn hè aduprata oghje ?

Ci serà abbastanza risolza umana è intelligenza cullettiva per risponde à tamanta operata ?

L'intraprese ùn anu micca sempre a cumpetenza LLC. Li si puderà porghje un aiutu à l'adopru di a lingua corsa in u quatru di a so attività ?


L'inghjocu di a pedagugìa casana. Un ecunumia di creazione in lingua corsa ?

U settore di a pedagugìa casana hè di grande primura in l'amparera naturale di u corsu. Ci serà manera di fà entre u corsu di modu naturale in e case ?

Cì serà manera dicreà un'ecunumia arimbata à a lingua corsa ? Mancanu piluzze parlanti, ghjoculi di svegliu linguisticu, ghjochi di sucietà, ghjochi video.


U corsu per prumove l'attività ecunomica

In un ecunumia di l'autenticità è di l'umanu, a prumuzione è a rilazione in lingua corsa ponu arricà un soprappiù ?



RISPOSTE È SCOPI : FILUSUFIA GENERALE


U corsu hè capace à turnà à invetassi

Tante lingue neolatine sò state capace à seguità è addattassi à  a mudernizazione è a meccanizazione di a sucietà. Dèmuci i mezi di fanne altrettantu. Iè, si pò parlà di tuttu in lingua corsa !

Avvicinemu, à u pianu linguisticu, u liceu è l'Università à u terrenu. Femu si chì a furmazione pùblica interagisca da veru cù u settore privatu arrichènduli una cumpetenza d'avvene.


A zitellina cum'è primura maiò

Rispundimu
à a dumanda massiccia di materiale pedagogicu è lùdicu in lingua corsa. A mubliglia è i ghjòculi per i zitelli sò cose chì màncanu è chì sò bramate : creemu !

Accumpagnemu i purtadori di prugetti à aduprà una lingua pertinente è efficiente, à destinazione di i zitelli.

Riflettimu à rende nurmale, un embiu cursòfonu in casa, da u vèculu à l'adulescenza.


Bisogna à pruduce veru, bisogna à parlà veru

U mudellu di a soprapruduzzione hè per passà. Omu volta à una cunsumazione in circuiti corti, da pruduttore à cunsumadore.

Arrichemu à i nostri pruduttori a cumpetenza LCC in a so attività prumuziunale. Una lingua di l'ìntimu hè prva d'autenticità.

À u crucivià di u Mediterraniu, hè ora di prumove a nostra pruduzzione in lingua corsa, cì capisce una migliarda di persone !

MEZI È STRATEGIA NANT'À U TERRENU


Mutualizà e cumpetenze, organizà a forza di travagliu di tutti

Creemu una basa di dati lessicali cumpiita per ogni settore d'attività.

In partenariatu cù i licei prufessiunali è l'IUT di Corsica, arrimbèmuci nant'à a sperienza di terrenu di l'intraprese avvezze à riceve liceani è studianti in alternanza o staziu. Custituimu tandu cun l'intraprese è i studianti, i lèssichi chì abbisògnanu à l'attività cuncernate è chì per ora ùn esistenu.

Gjuvèmuci di e sguatre di furmadori di Praticalingua per custituisce una prima cumissione di rilettura, currezzione è riflessione nant'à i neologismi cusì pruposti, nanzu chè di sottumètteli à l'auturità cumpetente di a Culletività di Corsica.


Incuragisce a cursufunizazione di l'intraprese

Purghjimu tandu, in linea è à gràtisi, una basa di dati classificata segondu i bisogni è i duminii d'attività.


Accumpagnà l'iniziative private

Prupunimu a nostra spertizia à purtadori di prugetti indipendenti chì li mancherebbi a cumpetenza LLC. Prupunimu dinù un sèguitu strettu, gràtisi, in a cuncezzione di u prugettu, a so realizazione è a so prumuzione.

Assiguremu una presenza nant'à u terrenu, disposta à risponde à bisogni linguistichi varii.