PRATICALINGUA

PRUGETTU DA MÈ À TÈ





A SFIDA


" U corsu s'ampara in casa, micca in scola "

Quantu volte si hè intesa quessa a cacciata ? Al di là di a cunsiderazione sociolinguìstica chi vuleria caccià à u corsu u dirittu d'esse à paru à altre materie in scola, è cunsiderendu l'incapacità di a Scola francese à ottene risultati boni in l'amparera di e lingue, ci serà manera di porghje à l'insignanti di/in lingua corsa, l'arnesi chì permetteranu di turnà à inventà un modu di diffusione di u corsu, à l'usu più pupulare ?

Ci serà manera di cuncernà è impegnà à tutti in a furmazione à a lingua nustrale in Scola


Màncanu e risolze pedagogiche

Quant'è l'insignanti di/in lingua corsa, u solu retale Canopé deve assume a pruduzzione d'arrembi pedagògichi. E so pruduzzione sò sempre di grande qualità. Stù retale d'insignanti è tècnichi hà cumpetenze, sennu è sperienza in a creazione di risolze pedagògiche. Di pettu à i bisogni di più in più impurtanti chì ricòllanu da u terrenu, puderìamu participà à nutrisce in risolze pedagògiche l'operata à prò di l'amparera di u corsu in Scola ?


RISPOSTE È SCOPI : FILUSUFIA GENERALE


A memoria di u " populu creatore "

Aiutemu l'insignanti di/in lingua corsa à sparghje a cumpetenza LLC purghjènduli ducumentazione in tanti duminii d'attività.

Pruducimu risolze scritte, pitturale, icunugràfiche, orale è visuale in i nostri attelli.

Femu ch'elle pòssanu, s'è a quantità è a qualità sò ghjudicate interessante da i nostri partenarii, ghjunghje in e sale di scola.

Impegnemu u citatinu in l'operata tamanta di diffusione chì a Scola assume spessu sola sola.

Salvemu tanti ducumenti (scritti, visuali è filmogràfichi) chì dormenu in casa di tant'è tanti.

Creemu l'opportunità, in tantu chè operatori di terrenu, di serve à riceve a pruduzzione artigianale è/o amatrice, di ducumenti, chì puderìanu avè un interessu pedagògicu, una volta assestati è curretti da una sguatra di prufessiunali.

Participemu à furmà i futuri furmadori : attori impegnati in attività in raportu cù i giòvani. Avemu sempre in Corsica una generazione di locutori nativi, sàppiamuli dà a pussibilità di trasmette una lingua schjetta è naturale.

MEZI È STRATEGIA NANT'À U TERRENU


Mutualizemu i ducumenti esciuti da l'attelli Praticalingua è dèmuli un primu assestu.

Utilizemu a cumpetenza di i nostri furmadori in tante discipline (lingue strangere, teatru, fottografia, assestu numèricu, mùsica è scrittura) da porghje u so aiutu è a so spertizia à l'iniziative private avviate versu a creazione di ducumenti.

Rispundimu dinù à a dumanda fàttaci da i nostri partenarii di u retale Canopé, à u cuntattu direttu di a Scola.

Creemu una basa di dati d'accessu liberu, per tutti, chì porghji testi di pruduzzione, di ricerca, o di cumplementi di furmazione.

Creemu un modu di remunerazione unicamente cunsacratu à valurizà u travagliu fattu da l'aderenti di Praticalingua o da ogni persona chì cullabureghja cun noi.

Sparghjemuci nant'à tutta a Corsica per permette di ricoglie è trattà e ricullate in ogni pieve, cun sguatre di currettori lucali è participà cusì à salvezza di e varietà linguistiche di u corsu.