PRATICALINGUA

PRUGETTU TERRA È GHJENTE





A SFIDA


U turìsimu di massa culpisce u nostru patrimoniu naturale

U nostru patrimoniu naturale hè preziosu. Chì ne serà s'ella cuntinueghja cusì a soprafrequentazione di u mare è a muntagna corsa, inghjennata da un turìsimu cuntemplativu è cunsumeristu ?

Puderemu truvà risposte alternative à a cummercializazione di u nostru mare è di a nostra muntagna ?


A stagione turìstica si stende guasi solu nant'à un mese di statina

Ci serà manera di prumove un turìsimu internu è esternu chi sia capace à interessà longu l'annata à di modu megliu spartutu, più misuratu, è puntellatu nant'à risolze nove o troppu pocu messe in avanti ?


E ricadute di u turìsimu sò assai.... ma micca per tanti

E ricadute in leia cù u turìsimu sò assai. Puderemu fà si ch'elle fùssinu megliu spartute ?


U turisimu cuntemplativu è cunsumeristu hè per passà

U mudellu di l'anni 70, quellu di u turìsimu di massa, cuntemplativu, hè per passà. Più và è più u paràmetru umanu sorge è s'impone. Vulemu pigliallu in contu ?

 


RISPOSTE È SCOPI : FILUSUFIA GENERALE


A patrimunializazione di u territoriu

Prumuvimu u nostru patrimoniu umanu, riccu d'interessu, di cunniscenze, di sapè è di sapè fà.

Incuragimu e dimarchje è l'evenimenti è puru e faccende chì rivèstenu un interessu culturale, civilizaziunale o patrimuniale siguru, longu l'annata.

Valurizmu è puntemu a cumpetenza lingua corsa fendu u ricensu di l'attori ecunòmichi è/o culturali cursòfuni.


L'ecunumia di e cumpetenze

Creemu un'ecunumia ingiru à u patrimoniu linguisticu è umanu induve ognunu ci pò piglià parte. Demu fiatu à un turìsimu internu, per i Corsi, aririmbatu nant'à a lingua è i sapè fà.


" Diversità face ricchezza "

Adupremu a lingua cum'è modu d'intercumprensione è anzi di cumunicazione prumuziunale in a vicinanza civilizaziunale cù i populi di a Romania.

Affirmemu a nostra cursufunia cum'è fundamentu di a nostra identità. Un ci lascemu micca chjode in una visione monolingua di u Mondu.


MEZI È STRATEGIA NANT'À U TERRENU


Travagliemu in l'attelli Praticalingua, aderenti cun furmadori, à creà una basa di dati cumpiita di ogni interessu lucale, umanu, patrimuniale è linguistu di Còrsica.

Andemu nant'à u terrenu à incuntrà l'attori, preparemu risolze in lingua corsa da guidà è avvià u visitadore.

Sugerimu parcorsi di scuperta, pieve à pieve. Prupunimu parcorsi temàtichi è calendarii, da offre pussibilità è iniziative diverse è varie.

Addunimu a forza di travagliu di centinaie d'aderenti Praticalingua à l'òpera di ricensu intrapresa digià da Compru in Corsu.

Prevedimu lochi d'accolta è l'alloghju induve u vistadore hè siguru di benefizià di un bagnu linguisticu, cù un modu di rimunerazione per l'allughjadore.

Creemu : una strada di a Lingua Corsa è di u Patrimoniu Umanu è Civilizaziunale è un labellu LCC per l'attori cursòfuni di e strada chì esistenu digià (vinu, sensi, artigianatu).

Appughjèmuci dinù nant'à attori digià impegnati nant'à u terrenu, (agenti di u PNRC, ODARC).